早前講過「唔輸就可以做富翁」的話題，網友Myself對此作出回應，值得一談。

    網友Myself話：「今朝同公司散友食早餐，散友話佢當年A level英文作文攞B，小弟問佢有咩秘訣，佢話方法好簡單，就係『唔好錯』，將一句好長好複雜既句子，拆成幾句簡單既句子，最緊要確保冇錯，唔錯就扣唔到你分，咁就自然攞高分。

定好止蝕 控制注碼

    用係股票場上，一般散戶太在意股價上升時可以賺幾多，忽略了股價下跌時可以輸幾多。要做到『唔輸』就係要控制風險。買入股票，風險就係股價下跌，要控制呢個風險，方法可以係只買好股，就算買完跌咗，好股長期有盈利，有好嘅派息，股價始終會浮上水面，再創新高，呢個係『投資的我』，以質素控制風險；爛股唔係唔可以買，但只能短炒，買前先定好『止蝕』，又或者『本來打算買十萬，就只買二萬』，以注碼控制風險。」

    Myself總結得好好，英文作文唔錯就攞B呢個例子不錯，我都學到嘢。我又舉個例子，有兩個人打功夫，一個後生仔拳風虎虎，又起飛腳，一副生人勿近咁款，打到身水身汗，但一個老坑慢慢行埋去，好滋油咁叉住後生仔條頸，後生仔竟然擋唔到，老坑呢招唔知係太極定係乜，總之好實用，好直接，但係唔好睇，當台下觀眾好期望後生仔打贏，最後見到佢咁簡單被人打低咗，大家都好無癮，掌都唔拍，一哄而散。

    呢個就係一般人自己人格分裂做「投機的我」和「投資的我」比併的結局，投機快上快落，好易贏，亦好易輸，就如後生仔打工夫咁，好過癮，好好睇，但未必好實用，打擂台打10次贏9次，結果係9比1，都係贏，炒股即使炒10次贏9次，都會輸，因為你愈賭愈大，最後1鋪輸番晒。80幾歲的巴菲特打贏N咁多個又睇得又打得的對沖基金後生仔，就係上述打擂台故事的真實版。

抽起部分利潤減風險

    投機太過癮，我建議大家唔好唔做，但要控制風險，同埋投機贏得多時，最好自己抽水，攞一兩成出來，抽走佢，做一些穩陣投資，買中電（002）股票又得，買間三四綫區域的地鋪收租都得，總之係有穩定收益的投資，兼且係唔會短期大升的投資（無大升就唔會大跌）。

    投機贏錢唔難，最難係唔輸，最難長勝，最難保住賺到的利潤，所以抽水係一個方法。巴菲特一年賺10%、20%就巴巴閉閉，你搵港股10大升幅榜，求其搵一隻去跟，又唔止蝕，都有50%機會跟到一隻爆升股，一係唔升，一升就20、30%都唔奇，你呢一刻超過巴菲特一年的回報，但點解炒細股的人做唔到巴菲特，因為佢賺完之後，好快又輸番出去，所以投機除咗要諗如何大贏之外，亦要諗如何小輸，贏間廠，輸粒糖，你就可以贏，那怕是輸咗3、4粒糖後才贏到間廠。

投資切忌太花巧

    至於投資，就如上述的老坑出招，只係一招，但要非常直接，候低買入好股，長揸唔沽而置富。切忌太多花巧，甚至換出換入游水都唔適宜，因為游兩游好易唔買番，騰訊（700）、比亞迪（1211）好多人買過，不過賺少少就走咗。

    我鍾意既投機又投資，長短兼備，我覺得投機難過投資，因為對手太強，他好像《1984》中的老大哥一樣，總是操控大局，所以我投機主要目的，是為了掌握市場的感覺，唔係博命。

陸羽仁