煎藥基本法馬虎不得

時間: 2017-07-31 / 分類: 阿樂專欄 / 發布者:editor_van

近來為病人開方,發覺很多人對煎藥的「基本法」,一知半解。
其實,這在中醫學裏,是一門專題學問,對於藥效非常重要,馬虎不得。
煎藥方法,由於藥材之不同,煎法也有不同,有所謂先煎、後下,又有煎湯代水、藥材另燉、包煎及磨粉沖入等等方法。又,煎藥煎多久?也極之重要。
我有一些病人是老太太,我問:「你煎藥煎得如何呀?」老太太曰:「哈,煎得不知幾好味!」我又問:「你俾幾多水、煎幾耐呀?」老太太曰:「我俾十碗水,慢火煲四個鐘,味道不知幾濃郁。」
哎呀,老天啊,「你……煲湯咁煲呀?」老太太得意曰:「梗係喇,我煲幾十年咯。」我曰:「弊咯!煎藥唔同煲湯,煲咁耐,藥效都飛走咯,最後出來啲都係對人體有害之物質啊!」老太太望住我,表示不明,我舉個例曰:「你係潮州人,應該飲過鐵觀音喇?頭一泡,三十秒就要倒出來,若超過二分鐘,你試吓,頭暈眼花、氣悶作嘔……」老太太即刻明白咯。
多年前,港大一位西醫教授,在報章上批評廣東人煲湯,煲三四個鐘,維他命ABCDE通通飛走了,只得一個「潤」字,北方人飲羅宋湯、酸辣湯、宋嫂魚湯,乃係滾湯,保存晒營養,所以北方佬係大隻。
此外,煎藥之藥煲及各種用具也很重要,有些西婦病人,煎藥用玻璃康寧煲,煲出之藥味就大不相同。同樣泡茶,用玻璃杯及傳統紫砂壺,茶味就大不相同。
還有一位西婦更好笑,我上門診治時,問她:「你嘅康寧煲蓋去邊?」她答「打爛咗,只好就咁煲咯。」哎呀!藥味都飛大半咯!

阿樂

(2017年7月28日見報)

查詢請電郵至:ahloksingtao@yahoo.com